HAYAG

 

Illustration from Pixabay

Adaptasyon ng pelikulang “The Witness” ng Japan.

 

 

   

Isinulat ni

Mariz Alliah K. Peṅaflor

2020

Mga Tauhan

Gwen Benitez – fresh graduate ng Criminology, 22 yrs old

Jude Salcedo – out-of-school youth, 19 yrs. old

Detective Cruz – propesor ni Gwen

Detective Serna- assistant ni D. Cruz

Mrs. Benitez – ina ni Gwen at Justin

Justin- 15 yrs. old, kapatid ni Gwen

Pako- 8 yrs. old

Bochog- 8 yrs. old

Duday- 7 yrs. old

Ning-ning- 6yrs. old

Master- Leader ng sindikato

Boss Jaime- tauhan ni Master, in-charge sa mga bata

 

Tagpuan

Laguna, kasalukuyan

 

 

 

 

 

Unang Yugto

Prologue

Sa kalsada. Gabi. Makikita ang

isang batang babae na nanlilimos.

May darating na isang lalaki na may hila-hilang maleta. Aabutan ng burger ang bata.

001 lalaki: Bata, kunin mo na to o

002 Ning: Salamat po. Kanina pa po ako gutom na gutom eh.

003 lalaki: Anong pangalan mo?

004 Ning: Ning-ning po.

005 lalaki: Nasan ang pamilya mo?

006 Ning: Wala na po akong pamilya.

007 lalaki: Gusto mo bang sumama sa’kin? Bibigyan kita ng marami pang burger saka magagandang damit.

008 Ning: Opo! Gusto ko po! Pero hindi po papayag ang boss ko.

009 lalaki: Huwag kang mag-alala, ako ang bahala sa kanya.

010 Ning: Talaga po? Pramis po yan ah!

011 lalaki: Oo naman. (aalis ang dalawa).

Makalipas ang ilang minuto, makikita ulit ang lalaki na hila-hila ang kanyang maleta. Hindi n’ya kasama ang bata.

 

Unang Tagpo

Sa headquarters.

Makikita ang 15 bata.

012 Pako: Nasan na kaya si Ning-ning? Dalawang araw na s’yang hindi umuuwi ah.

013 Bochog: Napaka-tigas talaga ng ulo ni Ning-ning kaya tayo napapahamak eh.

014 Duday: Ano ka ba Bochog, hindi ka ba nag-aalala kay Ning-ning? Baka kung mapano s’ya sa kalsada.

015 Bochog: Mas nakakatakot si Boss kesa sa mga siga sa kalsada.

016 Pako: Ek kung lumapit na kaya tayo sa mga puls.

017 Bochog: Nag-iisip ka ba? Pag nalaman ni Boss na lumapit tayo sa pulis papatayin n’ya tayo!

018 Duday: Anong gagawin natin? Nandyan na si Boss…

Darating si Master kasama ang kanyang mga tauhan. Magkukumahog ang mga bata at pipirmi sa sulok.

019 Master: (titingnan isa-isa ang mga bata) Jaime, hindi pa ba nahahanap yung isang bata?

020 Jaime: Hindi pa Master.

021 Master: Siguraduhin n’yo lang na hindi yun magsusumbong sa mga pulis.

022 Jaime: No problem Master, ako’ng bahala. May kontak na’ko sa loob.

023 Master: Mabuti naman.

 

Ikalawang Tagpo

 Sa kalsada. Gabi. Makikita ang isang

batang babae na nagbibilang ng barya.

May darating na isang lalaki, na may hila-hilang maleta. Aabutan ng burger ang bata.

024 lalaki: Bata gusto mo ba ng burger? Sa’yo na to o

025 Duday: Wow burger! Talaga po? Akin na to?

026 lalaki: Oo naman. Ano nga palang pangalan mo?

027 Duday: Duday po.

028 lalaki: Bakit nandito ka pa sa labas? Gusto mo ba ihatid na kita sa inyo? Dilikado sa kalsada kapag gabi.

029 Duday: Hindi po pwede mapapagalitan po ako. Kaya ko na po umuwi mag-isa.

030 lalaki: O sige ganto na lang, gusto mo bilhan pa kita ng burger para may iuwi ka sa inyo?

031 Duday: Pero… gabi na po kasi eh kaylangan ko na pong umuwi… si-sige po baka hinahanap na rin ho ako. (tatakbo)

032 lalaki: Sandali lang bata (hahawakan sa balikat). Sumamaka muna.

033 Duday: Ayoko po! (tutusukin ng ball pen ang kamay ng lalaki)

 

Ikatlong Tagpo

Sa madilim na kalsada. Makikita

Ang isang babaeng naglalakad

Makalipas ang ilang minuto ay darating si Duday na humahangos.

034 Duday: Ate, tulungan n’yo po ako! Hinahabol po ako nung mama!

035 Gwen: Ha?! Nasan na s’ya?

036 Duday: Hindi ko po alam! (iiyak)

037 Gwen: Magtago tayo. (pupunta ang dalawa sa mga basurahan)

Darating ang lalaki na nakasuot na ng mask at cap. May hila-hila itong maleta. Hinahanap si Duday.

038 lalaki: Duday… Duday… alam kong nagatatago ka lang lumabas ka na. Wag kang matakot, hindi kita sasaktan.

Tatawag si Gwen sa mga pulis.

039 lalaki: Huli ka!

040 Gwen: Ah! Bitawan mo s’ya! Sino ka ba?!

041 lalaki: Wag kang mangialam dito! (iuuntog ang ulo sa pader pagkatapos ay hahampasin ng bote sa mukha)

042 Gwen: Ah!!! Ah!!!

043 Duday: Ayokong sumama sa’yo!

044 lalaki: Manahimik ka! (paaamuyin ng pampatulog, pagkatapos ay ilalagay sa loob ng maleta)

045 Gwen: Ah!!! Tulungan n’yo kami!

Haharangin ni Gwen ang lalaking nakaka-skateboard.

046 Jude: Ahh! (magugulat sa duguang mukha ni Gwen).

047 Gwen: Tulong… kinidnap yung bata! Habulin mo s’ya please!

048 Jude: Sige ho d’yan lang ho kayo. (hahabulin nag lalaki pero nakalayo na ito)

049 Gwen: Nasan si Duday?

050 Jude: Sorry di ko na s’ya naabutan.  

051 Gwen: Hintayin nating dumating ang mga pulis. Natawagan ko na sila.

052 Jude: Hindi na, kaylangan mo nang madala sa ospital. Malala ang sugat mo.

053 Gwen: Hindi pwede… si Duday… kinidnap s’ya- (mawawalan na ng malay)

054 Jude: Miss! Miss! (bubuhatin si Gwen. Tatakbo)

 

Ikaapat na Tagpo

Sa ospital. Makikita si Gwen

na walang malay. Nakaupo sa gilid

ng kama ang kanyang nanay.

055 Mrs. Benitez: Doc, ano po ba ang kalagayan ng anak ko?

056 Doktor: Dahil po sa bubog na tumusok sa mga mata n’ya, nagkaroon po s’ya ng corneal laceration. Ito po ang tawag sa sugat sa cornea. Hindi naman po masyadong fatal ang kondisyon ng kanyang mga mata kaya hindi po s’ya mabubulag. Yun nga lang, kahit nakapag-undergo na ang pasyente ng surgery ay kailangan pa rin n’yang manatili dito sa ospital for a few days para ma-check pa rin natin ang kondisyon n’ya. Also, maayos naman ang resulta ng kanyang CT scan, wala naman pong nakitang fracture sa kanyang skull. However, as I was saying Mrs. Benitez, kailangan pa rin n’yang manatili sa ospital for further observation.

057 Mrs. Benitez: Salamat Dok.

058 Gwen: Dok, matatagalan po ba ang paggaling ng mga mata ko? Aabutin po ba yon ng taon?

059 Doktor: No don’t worry. Dahil hindi naman malalim ang sugat na tinamo ng mga mata mo at wala namang tissues na na-damage, in a matter of 2 to 3 weeks ay gagaling rin ito.

058 Gwen: Salamat po.

Aalis na ang Doktor.

060 Gwen: Ma, paano po pala ako nakarating dito?

061 Mrs. Benitez: May isang binata raw na nagdala sa’yo dito. Sayang nga at hindi ko naabutan, hindi ko tuloy napasalamatan. Ano bang nangyari sa’yo anak?

062 Gwen: Si Duday… kinidnap yung bata… nakita ko s’ya… Kaylangan nating magpunta sa mga pulis.

063 Mrs. Benitez: Hindi ka pa pwedeng lumabas anak, ang sabi ng mga doktor kaylangan munang maghilom ng mga mata mo.

064 Gwen: Kung ganon, samahan n’yo na lang po ako sa front desk, kaylangan kong malaman ang pangalan nung lalaki, saka, kaylangan nating tawagan ang mga pulis. Hindi ko pwedeng hindi sabihin ang nalalaman ko dahil baka kung mapano na yung bata.  

 

Ikalimang Tagpo

Sa hideout.

Makikita ang 14 bata.

065 Jaime: Nasan si Duday ha?! Wala bang sasagot sa inyo? Gusto n’yong putulin ko ang mga dila n’yong walang silbi?!

066 Pako: Boss Jaime, eh kung lumapit na tayo sa mga pulis, baka nakidnap sina Ning-ning at Duday!

067 Jaime: Sira-ulo ka ba? Anong sasabihin mo sa mga pulis? Na taga-dito ka? Subukan n’yo lang na kumanta sa mga pulis at papatayin ko kayong lahat! Tandaan n’yo, may tao ako sa loob. At wag na wag n’yong susubukan tumakas dahil hindi kayo makakalayo ng buhay!

 

Ikaanim na Tagpo

Sa ospital. Makikita ang dalawang

detective na kausap ni Gwen.

068 Detective Cruz: Ms. Benitez, sinasabi mo bang nakita n’yo ang mukha ng suspect?

069 Gwen: Hindi po masyado dahil naka-mask s’ya, pero nakita ko ang mga mata n’ya. At saka, sa tantya ko nasa 5’10 ang tangkad n’ya at medyo katamtaman ang kanyang katawan. Malinaw ko rin pong naaalala ang boses nang suspect.

070 D. Cruz: May iba pa bang witness ang nangyari?

071 Gwen: Meron po kaso… hindi ko po nakuha ang pangalan n’ya.

Magsasalita sana ang isa pag detective subalit mahahalata na may sakit ito.

072 D. Cruz: Ako na detective. Natatandaan mo ba ang mukha n’ya?

073 Gwen: Hindi ko nakita ang mukha n’ya pero sigurado po akong nakita yon sa CCTV nitong ospital.

074 D. Cruz: Sige ho, makikipag-ugnayan na lang kami sa inyo kapag nahanap na namin ang witness. Detective, siguro magpahinga ka muna at baka nasosobrahan ka na sa pagtatrabaho (matatawa).

 

Ikapitong Tagpo

Sa kalsada. Makikita ang

mga tindera sa bangketa.

Makikita si Gwen at ang nanay n’ya na naglalakad.

075 Bochog: Boss palimos po, pangkain lang po…

076 Pako: Bochog, makinig ka naman sa’kin. Pumunta na tayo sa mga pulis, di bale nang mapagalitan tayo nina Boss Jaime. Hindi aa y nag-aalala kina Ning-ning at Duday?

077 Bochog: Hindi mo ba narining ung sinabi ni Boss Jaime? Papatayin nila tayo kapag nagsumbong tayo sa mga pulis. Baka baka nakakalimutan mo, may mata si Boss Jaime sa loob. Kung gusto mong mamatay, mag-isa ka na lang wag mo kong idamay! (pupunta sa ibang pwesto)

078 Pako: Hindi naman sila yung isusumbong natin ah, ipapahanap natin sina Ning-ning at Duday!

079 Gwen: Excuse me, narinig ko kasing may pinag-uusapan kayong Duday ang pangalan. Nasaan s’ya?

080 Pako: Hindi ko po alam eh, nawawala po siya.

081 Gwen: Kelan pa? Saka, pwede mo ba y s’yang i-describe?

082 Pako: Apat na araw na po s’yang nawawala. Ahmmm… pa’no ko ba ide-describe si Duday… mahaba ang buhok n’ya at maliit s’yang bata kasi 7 yrs. old palang s’ya. Saka, bilog ang mga mata n’ya.

083 Gwen: May picture ka ba ni Duday?

084 Pako: Wala po eh. Bakit n’yo nga pala s’ya hinahanap?

085 Gwen: Kasi… kasi… gusto kong tumulong na hanapin s’ya.

086 Pako: Nakidnap po ba si Duday?!

087 Gwen: Wag kang mag-alala, mahahanap natin s’ya. Alam mo ba kung nasaan ang mga magulang ni Duday?

088 Pako: Wala na po kaming mga magulang.

089 Gwen: Kung ganon, sino ang nag-aalaga sa inyo?

090 Pako: Hindi ko po pwedeng sabihin. Matagal ko na nga pong gustong pumunta sa mga pulis para ipahanap sina Duday at Ning-ning pero hindi po kami pwedeng pumunta dun. Saka, ang sabi sa’min, may tao daw po s’ya sa loob. Ate, mahahanap n’yo po ba ang mga kaibigan ko?

091 Gwen: Oo naman. Pangako yan. Babalik ako dito bukas ng umaga. Magsasama ako ng magdo-drawing kay Duday at Ning-ning para mahanap natin sila. Ano nga pala ang pangalan mo?

092 Pako: Pako po.

093 Gwen: (Biglang tutunog ang cell phone ni Gwen.) Sandali lang ah. Salamat Pako … may tanong pala ako, sinabi mo bang may tao sila sa loob?

094 Pako: Ano po ba’ng ibig sabihin nun?

095 Gwen: Mahirap ipaliwanag eh. Pwede ko bang malaman kung saan kayo nakatira?

096 Pako: Wa-wala po, wala po kaming bahay. (makikita ang pag-iwas sa tanong)

097 Gwen: Ganun ba?

098 Pako: Sige po bukas na lang. (Magmamadaling umalis).

 

Ikawalong Tagpo

Sa presinto.

099 Jude: Sir ako nga ho yang nasa CCTV, pero hindi po ako witness sa krimen na yon.

Darating si Gwen.

100 Gwen: Nagsisinungaling ho s’ya, nakita n’ya rin yung criminal.

101 Jude: Bakit nakita mo ba?

102 Gwen: Hindi ko nakita, pero sinabi mo sa’kin na nakita mo s’yang umalis!

103 Jude: Wala akong natatandaan na sinabi ko yon. Pasensya na sir ha pero wala ho akong maitutulong sa inyo. (aalis)

104 D. Cruz: Pasensya na Ms. Benitez pero kung totoo nang ikaw lang ang saksi sa krimen na ito, malabong masimulan ang pag-iimbestiga sa hangga’t hindi bumubuti ang kalagayan mo. Walang CCTV sa lugar na yon kaya ang statement mo lang ang inaasahan namin.

105 Gwen: Naiintindihan ko po. Pero, may isa pa po akong paraan para masimulan na ang paghahanap sa bata.

106 D. Cruz: Paano?

107 Gwen: May kilala akong pwedeng mag-describe kay Duday. Sa gano’ng paraan, pwede na tayong gumawa ng posters.

108 D. Cruz: Pero hindi tayo nakakasiguro na s’ya nga ang batang hinahanap natin.

109 Gwen: Totoo po yan, pero ang Duday na kilala n’ya ay nawawala rin at ang mga batang yon ay natatakot ireport ang tungkol dito.

110 D. Cruz: Posible kayang-

111 Gwen: hawak sila ng sindikato

112 D. Cruz: Kung walang naglalakas-loob na magreport, baka may look-out sila dito sa loob. Iimbestigahan ko ang tungkol dito.

113 Gwen: Salamat po Detective. At saka, pwede ko po bang hingin ang address nung witness, gusto ko sana s’yang makausap.

114 D. Cruz: Jude Salcedo ang pangalan n’ya at ito, ito ang address n’ya (may iaabot na papel).

115 Gwen: Salamat po. (aalis)

 

Ikasiyam na Tagpo

Kinabukasan. Sa tapat ng bahay nina Jude.

Makikita ang mga posters nina Duday at

Ning-ning sa mga pader.

116 Gwen: Excuse me, taga-dito po ba si Jude Salcedo.

117 Nelson: Oho, sino ho ba sila?

118 Gwen: Ahm, ako si Gwen. Gusto ko lang s’yang makausap.

119 Nelson: Sige ho, saglit lang.

Papasok ang lalaki sa loob ng bahay.

120 Justin: Ate, sino po ba yun?

121 Gwen: S’ya yung sinasabi kong witness sa krimen. Wag mo sasabihin kay nanay na isinama kita dito ah kundi lagot ako sa kanya.

122 Justin: Syempre ate ako pa. At saka, ang saya nga nito eh pakiramdam ko pulis rin ako, katulad mo.

123 Gwen: Tsk, hindi pa naman ako pulis eh kasi hindi pa ako pumapasa sa training. Isa pa, dahil sa kondisyon ko ngayon, matagal pa bago ako maging ganap na pulis.

Maya-maya ay lalabas si Jude.

124 Jude: Anong pa bang kaylangan mo? Di ba sinabi ko na sa’yo na hindi ako witness? Umalis na kayo.

125 Gwen: Sandali lang. Hindi ka ba naaawa dun sa bata? Nalaman ko na hindi lang si Duday ang nawawla. Hindi natin alam kung ano ang ginawa ng suspect sa kanila. Kaylangan natin s’yang mahuli, baka sakaling mailigtas pa natin sila.

126 Jude: Nag-aaksaya ka lang ng oras dahil hindi kita matutulungan.

127 Gwen: Bakit ba ayaw mong maki-cooperate? Tingnan mo ko. Dahil sa kriminal na yon, na-damage ang mga mata ko, kung tutuusin natatakot din ako para sa buhay ko. Pero pa’no ko mananahimik kung hanggang ngayon pagala-gala pa rin ang kriminal na gumawa ng lahat nang ito?

128 Jude: Pasensya ka na, pero labas ako sa problema mo.

129 Gwen: Ano bang pumipigil sa’yo, bakit hindi mo masabi ang totoo?

 

Ikasampung Tagpo

Sa hideout.

130 Jaime: Dali, kunin n’yo na yung mga bata, tatakas tayo! Dun sa likod!

131 Pulis 1: Wala na kayong tatakbuhan, sumuko na kayo!

132 Pulis 2: ibaba n’yo yang mga baril n’yo. Taas kamay! Posasan na yang mga yan.

Bibitbitin ng mga pulis sina Jaime at ang mga bata.

 

Ikalabing-isang Tagpo

Sa presinto. Kinabukasan.

133 Gwen: Narinig ko po na na-rescue na yung mga bata kahapon.

134 D. Cruz: Oo, maraming salamat sa impormasyon na ibinigay mo.

135 Gwen: Nahuli na rin po ba yung look-out nila dito?

136 D. Cruz: Ang nakakatawa sa mga masasamang tao, hihilahin din nila pababa ang mga kasamahan nila.

137 Gwen: Malaking tao po ba ang nahuli n’yo ngayon?

138 D. Cruz: Hay, ewan ko ba, kaming mga pulis ay para ring mga poon sa larong chess, madalas mga poon lang din ang makakin mo. Maswerte ka na kung makakain ka ng bishop o kabayo. Kaya ang Queen, malaya pa ring gumagala at pumapatay sa larong ito.

139 Gwen: Pero kung hindi lalaban ang poon, ano’ng gagawin n’ya? Magtatago o di kaya’y susunod sa agos? Naniniwala ako na may magagawa ang poon para baguhin ang takbo ng laro kahit malakas ang kalaban.

140 D. Cruz: (mapapangiti) Ang mga kabataan talaga, may kakaibang mga pananaw.

141 Gwen: (mapapangiti) Meron po pala akong bagong impormasyon na makakatulong sa kaso.

142 D. Cruz: Ano yon?

143 Gwen: Yung mga batang nawawala, pareho silang pulubi at walang magulang kaya walang nagreport na nawawala sila. Pero pa’no n’ya nalaman na walang nagrereport sa kanila? Ibig sabihin yung taong kumidnap sa mga bata ay may access sa mga impormasyong ganito.

144 D. Cruz: Posible kayang isang pulis din ang suspect?

145 Gwen: Yun ho ang suspetsa ko. Two weeks ago nawala si Duday. At least two weeks rin bago yun, nawala rin daw si Ning-ning. Detective, meron po bang mga pulis na nadestino dito sa estasyon around a month ago?

146 D. Cruz: Oo, apat sila. Kaylangan kong isa-isahin yung mga distritong pinanggaligan nila para makakuha ng lead. Mga pulubing walang magulang ang tinatarget ng kriminal dahil kapag walang nagreport ng krimen hindi s’ya mahuhuli.

 

Ikalabindalawang Tagpo

Sa bangketa. Makikita si Gwen na

naglalakad mag-isa.

Maya-maya ay huhulihin ni Gwen gamit ang kanyang baston.

147 Gwen: Sino ka? Bakit mo ko sinusundan?

148 Jude: Ako to si Jude.

149 Gwen: Anong kaylangan mo?

150 Jude: Gusto ko sanang magsorry nung nakaraan. Nakapag-isip-isip na ko. Tutulong ako sa kaso.

151 Gwen: Bakit nagbago ang isip mo?

152 Jude: Wag ka na magtanong dahil baka magbago pa ang isip ko.

153 Gwen: Salamat. Maraming salamat. Gwen nga pala ang pangalan ko. (iaabot ang kamay pero hindi ito papansinin ni Jude)

 

Ikalabintatlong Tagpo

Sa madilim na kalsada. Gabi.

Habang naglalakad si Jude, mapapansin n’ya na parang may sumusunod sa kanya. Tatakbo ito, at hahabulin siya ng lalaking may dalang baril. Mababril si Jude at tatakas ang kriminal.

 

Tapos ng Unang Yugto

Ikalawang Yugto

Unang Tagpo

Sa ospital. Kinabukasan.

Nagmamadaling papasok si Gwen sa kwarto kasama ang ina.

154 Gwen: Detective, ano po ang nangyari?

155 D. Cruz: Natagpuan siya sa isang madilim na iskinita. May tama s’ya ng baril sa balikat at sa may tagiliran.

156 Gwen: Sa palagay n’yo po ba may kinalaman ito sa kaso?

157 D. Cruz: Hindi ko sigurado pero tinitingnan na rin namin ang anggulong yon. Sa ngayon, kaylangan muna nating hintaying magising ang pasyente para masimulan na ang pag-iimbestiga sa nangyari.

158 Gwen: Yan ang mahirap dahil wala namang mga streetlights at CCTVs sa mga kalsada, mabagal tuloy ang usad ng imbestigasyon sa mga krimen sa lansangan. Bakit ba kasi hindi yan inaaayos ng barangay?

159 D. Cruz: Ganun talaga, nakakabulag ang pera. Kapag sinabi ni Chief na bitawan ang kaso, wala kang magagawa.

160 Gwen: Kumusta na po ba ang kaso ni Duday?

161 D. Cruz: Sa ngayon hindi ko pa natutukoy kung sino ang kriminal pero sigurado akong malapit na natin s’yang mahuli. Kaylan nga pala tatanggalin ang bendang yan?

162 Gwen: Next week po siguro. Sabi ng doktor maganda naman daw po ang progress ng mga mata ko.

163 D. Cruz: Magandang balita yan. Bilang propesor mo alam kong magiging isang magaling na pulis ka sa hinaharap. Kaya nalungkot talaga ako nang malaman kong na-aksidente ang mga mata mo.

 

Ikalawang Tagpo

Sa bahay nina Gwen.

Makikita ang lalaking nakatalikod. Tinitingnan ang mga larawan sa mga pasimano. Papasok si Justin sa sala.

164 Justin: Sir pasensya na po kayo ah wala pa po kasi si ate eh. Inom po muna kayo ng juice. Ano nga po ulit ang pangalan n’yo? Itetext ko-

Mapuputol ang sasabihin ni Justin dahil sasaksakin s’ya nang tatlong beses sa likod ng lalaking nakamask.

 

Ikatlong Tagpo

Sa sala nina Gwen. Gabi.

165 Mrs. Benitez: Bakit ba napakadilim dito? Ang bilin ko pa naman kay Justin wag aalis ng bahay at hintayin tayo.

166 Gwen: Baka po may binili lang.

167 Mrs. Benitez: Saglit nga at bubuksan ko ang ilaw. (pagkabukas ng ilaw) Ah!!!!!!!!!!! Justin anak!

168 Gwen: Ma, ano pong nangyari?

169 Mrs. Benitez: Ang kapatid mo… may sumaksak sa kapatid mo…

170 Gwen: Ha?! Ito po,tumawag kayo ng ambulansya. Tawagan n’yo rin po ang mga pulis (iaabot ang phone)

 

Ikaapat na Tagpo

Sa ospital. Nakaupo sina Gwen at ang ina

 sa bench sa labas ng kwarto.

Darating si Jude na humihingal.

171 Jude: Gwen, nalaman ko na nandito rind aw kayo sa ospital. Anong nangyari?

172 Gwen: Nasaksak ang kapatid ko. Kasalanan ko to… ako ang habol ng kriminal.

173 Jude: Pa’no mo naging kasalanan? Gusto mo lang ng hustisya.

174 Gwen: Ayoko nang mangialam

175 Jude: Pero malaki na ang naitulong mo sa imbestigasyon. At kaylangan ka nila.

176 Gwen: Hindi ko na kayang tumulong pa! Hindi mo ba nakikita? Muntik na nga ako mabulag oh? Tapos ngayon kritikal ang sitwasyon ng kapatid ko. Sino ang susunod? Si mama?! At ikaw, alam kong takot ka rin para sa buhay mo kaya hesitant kang tumulong di ba?

177 Jude: Hindi yun ang dahilan ko. Sorry kung pinilit pa kita.

Darating ang doktor.

178 Doktor: Kayo po ba ang ina ng biktima?

179 Mrs. Benitez: Oo nga ho. Ano po ang kalagayan ng anak ko?

180 Doktor: Malala po ang tinamong saksak ng anak ninyo. Natamaan po ang kanyang left atrium at lungs. Hindi po kinaya ng pasyente ang trauma na dinulot nun. I’m sorry Mrs. Benitez pero wala nap o ang anak ninyo.

181 Mrs. Benitez: Hindi… hindi ako naniniwala… Justin anak!

Nagmamadaling papasok sa loob ng kwarto ang tatlo.

 

Ikalimang Tagpo

Sa isang bakanteng coffee shop.

Makikitang may kausap si D. Cruz

Makikita ang isang restaurant crew na maglalapag ng kape sa lamesa.

182 Pulis 3: Detective Cruz, ito na po ang mga impormasyon na pinapakuha ninyo.

183 D. Cruz: Salamat Officer.

184 Pulis 3: Bakit po ba dito n’yo gustong magkita? Sana pinapunta n’yo na lang po ako sa presinto.

185 D. Cruz: Wala naman, may kaylangan lang akong kumpirmahin.

Bubuksan ang package at isa-isang pag-aaralan ang mga papel.

186 Pulis 3: Nakuha ko ho ang mga files na yan sa last three districts na pinanggalinggan nina PO2 Sanchez, PO1 Fernandez, Inspector Salvador at Detective Serna. Nakalagay din ho d’yan kung gaano sila katagal na na-destino doon.

187 D. Cruz: Puntahan natin ang mga lugar na ito. Kaylangan natin mag-interview ng mga posibleng witness.

188 Pulis 3: Pero paano detective? Wag n’yo sabihing magtatanong-tanong tayo sa mga batang palaboy?

189 D. Cruz: Ganun na nga. Sa ganung paraan din tayo nakakuha ng lead sa kasong ito hindi ba? Kaya hindi iyon isang imposibleng bagay.

 

Ikaanim na Tagpo

Sa bakanteng lote.

Makalipas ang dalawang araw.

190 D. Serna: Sir, bakit n’yo po ako gustong makausap dito?

191 D. Cruz: Si Duday at ang iba pang batang nawawala, anong ginawa mo sa kanila?

192 D. Serna: Ano’ng sinasabi n’yo? Hindi ko kayo maintindihan.

193 D. Cruz: Wag ka nang magdahilan, alam ko na ang totoo! Pulis ka pa naman, ikaw dapat ang nagpoprotekta sa kapakanan ng mga batang yon! Nasan ang mga bata?!

194 D. Serna: Hindi ko naman gustong saktan sila eh. Pero tama kayo, kaylangan ko na nga sigurong ayusin ang lahat. Alam n’yo ba, sa trunk ng kotse ko, nadun pa yung batang kinuha ko kahapon. Puntahan n’yo na s’ya dun bago pa s’ya malagutan ng hininga.

195 D. Cruz: Ano?  

Maglalakad si Detective Cruz paalis pero sasaksakin siya ni Serna sa likod hanggang sa humandusay. Tutunog ang cell phone nito kaya’t kukunin ni Serna at titingnan. Pagkatapos ay hihilahin ang bangkay ng detective kung saan.

 

Ikapitong Tagpo

Makikita sina Gwen at Mrs. Benitez

na nag-aayos ng mga gamit

Tutunog ang cell phone ni Gwen.

196 Gwen: Kuya, pakitingin naman po kung sino ang nagtext.

197 lalaki 2: Detective Cruz ho ang nakalagay.

198 Gwen: Ano pong sabi n’ya?

199 lalaki 2: Eh ang sabi ho dito, magkita daw ho kayo ngayon sa lugar ng krimen, may mahalaga daw po siyang sasabihin.

200 Gwen: Salamat po.

201 Tita Precy: Jun-jun, pakilabas na nga nitong malaking box, tapos isunod mo yung isa pa dun sa gilid.

202 Gwen: Tita Precy, aalis lang po ako sandali, kakausapin ko lang po si Detective Cruz. May mahalaga daw po s’yang sasabihin sa’kin.

203 Tita Precy: Ay teka, hintayin mo muna ang mama mo baka magalit yun. Saka kaylangan mo ng kasama, pa’no ka maglalakad n’yan?

204 Gwen: Kaya ko na po ang sarili ko saka, babalik din naman po ako agad. Kapag hinintay ko pa si mama, siguradong hindi n’ya po ako papayagang pumunta. Sorry po Tita, pero hindi po ako mapapalagay hangga’t hindi nakakamit ang hustisya sa pagakamatay ng kapatid ko at sa pagkawala ng mga bata.

Makikitang lalabas si Gwen.

205 Tita Precy: Gwen sandali, ikaw talagang bata ka! (itetext ang mama ni Gwen)

 

Ikawalong Tagpo

Sa bakanteng lote malapit sa

lugar ng krimen. Makikitang

naghihintay si Gwen.

Mararamdaman ni Gwen ang paglapit ng isang lalaki.

206 Gwen: Detective nand’yan na pala kayo, ano po ba yung gusto n’yong sabihin?

207 Serna: Sorry ha, natagalan ako.

208 Gwen: Hindi ikaw si Detective Cruz. Ang boses mo…

209 Serna: Matalas pala ang memorya mo?

210 Gwen: San mo dinala si Detective?! At san mo dinala sina Duday?!

211 Serna: kasama na nila ang kapatid mo.

212 Gwen: Sabi ko na nga ba ikaw rin ang pumatay sa kapatid ko! Sisiguraduhin kong mabubulok ka sa kulungan!

213 Serna: Kung mabubuhay ka pa (akmang sasaksakin pero makakiwas si Gwen)

Tatakbo si Gwen. Biglang tutunog ang cell phone n’ya. Tunatawag si Jude.

214 Gwen: Hello?

215 Jude: (sa telepono) Ako to si Jude.

216 Gwen: Jude, ivideo-call mo ko dali!

217 Jude: (sa telepono) Bakit?

218 Gwen: Hinahabol ako nung suspect!

219 Jude: (sa telepono) Sandali. (ibababa ang telepono. Tutunog ulit)

220 Jude: (sa telepono) Ayan na. Anong gagawin ko?

221 Gwen: I-guide mo ko. (ipapakita ang paligid) Nasan s’ya?

222 Jude: Sa gilid mo TAKBO! Nasan ka?

223 Gwen: Around the area kung saan nawala si Duday. Magkikita dapat kami ni Detective Cruz sa crime scene pero hindi s’ya dumating.

224 Jude: Nasan na s’ya?

Iapapakita ni Gwen ang likuran.

225 Jude: Lumiko ka sa kanan. Patingin ako ng paligid. Magtago ka muna dun sa mga basura. Pupunta ko d’yan!

226 Gwen: Wag na, tumawag ka na lang ng mga pulis!

227 Jude: Oo sige, wag mong ibababa- Nelson, tumawag ka ng pulis dali! Hello Gwen? Hello?!

Mapuputol ang tawag.

228 Gwen: Kainis, ba’t ngayon ka pa na-low bat!

Maya-maya ay mararamdaman ni Gwen ang pagdating ng lalaki

229 Serna: Gwen, pwede ba, alam kong hindi ka pa nakakalayo. Lumabas ka na d’yan. Alam mo, bilib din ako sa’yo eh, akalain mo yon bulag ka na nga nagawa mo pa kong kantiin. Balita ko, magpupulis ka daw? Masyado ka namang dedicated sa trabahong to, kung tutuusin, wala ka namang mapapala sa pagliligtas ng buhay ng iba.

Maglalakad ng dahan-dahan si Gwen, palayo sa boses.

230 Serna: Huli ka!

234 Gwen: Ah!!!

Tatakbo si Gwen ng mabilis pero maaabutan s’ya ni Serna.

235 Serna: Akala mo ba matatakasan mo ko?

236 Gwen: Bakit mo ba ginagawa to? Pulis ka di ba? May sinumpaan kang tungkulin, at yun ang ipagtanggol ng kapakanan ng marami, pero ano’ng ginagawa mo? Ginagamit mo ang trabaho mo para gawin ang mga gusto mo! Pumapatay ka ng mga inosenteng buhay!

237 Serna: Tumahimik ka! Ano ba’ng pakialam mo? Pinili ko ang trabahong to para magawa ko ang gusto ko. Pero dahil sa’yo nahuli ako ni detective.

238 Gwen: Kaya pinatay mo rin s’ya ganun ba?! Magbabayad ka! (i-isprayan ni Gwen ng pepper spray ang mata ni Serna).

239 Serna: Ah!!! Hindi ka makakatakas!

Hihilahin ni Serna ang buhok ni Gwen, at sasakalin ito.

240 Serna: (tatawa) Pinapahirapan mo ko ah, pero pasensya ka na mas malakas ako sa’yo.

Maya-maya ay maririnig ang sirena ng mga pulis.

241 Pulis 1: Detective Serna, sumuko ka na, napapalibutan ka na namin!

242 Serna: Sige, lumapit kayo, papatayin ko ang babaeng to! (tututukan ng patalim si Gwen)

243 Pulis 2: Kapag hindi mo binaba yang patalim mo, ikaw ang babarilin namin!

244 Serna: Wala akong pakialam

245 Pulis 1: Ibaba n’yo ang mga baril n’yo!

246 Serna: D’yan lang kayo, walang susunod!

Ibababa ng mga pulis ang baril. Gagamitin n’yang pananggalang si Gwen hanggang makalayo ng bahagya. Maya-maya ay sisipain s’ya ni Gwen at tatakbo palayo. Babarilin ng pulis ang dalawang binti ni Serna kaya hindi na n’ya mahahabol si Gwen. Huhulihin ng mga pulis ang suspect.

247 Jude: Gwen, ayos ka lang ba?

248 Gwen: Oo, salamat sa tulong mo. Tapos na rin ang kaso sa wakas. (maiiyak)

 

Ikasiyam na Tagpo

Sa sementeryo. Makikita si

Gwen, ang mama niya at si Jude na

nakatayo sa harap ng mga puntod.

249 Gwen: Sayang no, dahil sa kasong ito, may mga buhay na nasakripisyo.

250 Jude: Ginawa mo ang lahat ng makakaya mo. Sa totoo lang, bilib ako sa’yo. Kapag nakalaya ako, ipinapangako ko na mag-aaral akong mabuti, at magiging magaling din akong pulis na gaya mo. Dalawang taon lang naman ang sintensya ko.

251 Gwen: Basta ipangako mo na magpapakabait ka at hindi na magnanakaw ulit, matutupad mo ang pangarap mo.

252 Jude: Oo pangako yan. Galingan mo sa training.

253 Gwen: Oo pangako ko rin yan sayo.

 

WAKAS

 

 

 

 

 

 

 

 

 

 

 

 

 

 

 

`